Dolce&Gabbana -ს 2022 წლის სარეკლამო კამპანია და ჯენიფერ ლოპესის მთავარი როლი

  მოდის სამყაროში დიდი მითქმა-მოთქმით დაიწყო! ყველა ელოდა იტალიური ბრენდის გასაიდუმლოებულ ექსკლუზივს: Dolce&Gabbana სათვალეების ახალი კოლექციის სარეკლამო კამპანიაში მსოფლიო მასშტაბის მეგა-ვარსკვლავს იღებდა! და ვინ იყო ეს ვარსკვლავი?! სწორედ ამ აჟიოტაჟის და ციებ-ცხელებიანი მოლოდინის რეჟიმში აცხოვრა ამ მთავარმა კითხვამ მოდის ყველაზე იდუმალი და მოულოდნელობებით აღსავსე ინდუსტრია.
და ბოლოს, სამყარომ ბრენდის კამპანია იხილა! კამპანიაში ქალის მთავარი როლის შემსრულებელმა ნამდვილი ფურორი მოახდინა! სულ სხვანაირად მხურვალე და მოგიზგიზე ცეცხლი დაანთო, აი, სწორედ იმ მეგა-ვარსკვლავმა, რომელიც ვინ აღმოჩნდა?! ვინ და, – ჯენიფერ ლოპესი. რა თქმა უნდა, ყველასთვის ცნობილი და ბევრისთვის – მილიონებისთვის – განუმეორებელი, მომხიბლავი, დამატყვევებელი ჯეი ლო!
Dolce&Gabbana -ს სათვალეების 2022 წლის სარეკლამო კამპანია – ვიდეო რგოლები და ფოტოები – უნიკალური იტალიური ტემპერამენტის და სტილის გამომხატველი საუკეთესო ნიმუშებია. ჯენიფერ ლოპესი – ქალი და დევიდ განდი – მამაკაცი ურთიერთმიზიდულობის და ლტოლვის სიუჟეტს, ქიმიას თუ ხასიათს იდეალურად გამოხატავენ. ჯენიფერის სამსახიობო ოსტატობის და არტისტიზმის წყალობით, საბედისწერო, მაცდური, კეკლუცი და ყველაზე სასურველი ქალის პერსონაჟი იქმნება, ხოლო დევიდი წარმოგვიდგენს ნამდვილ იტალიელ დახვეწილ და ელეგანტურ მამაკაცს, რომელიც უფრო გალანტური ინტელიგენტია და მთელი მისი სიძლიერე სწორედ ამ თავშეკავებულობაშია.

  ამ უნიკალურმა კამპანიამ ელვისებურად დაიპყრო მსოფლიოს დედაქალაქების უდიდესი, უმთავრესი და უპირველესი ქუჩები, გამზირები, აეროპორტები, ბანერები, ბილბორდები, ეკრანები, სავაჭრო ცენტრები, მაღაზიები, ბუტიკები, ოპტიკის სალონები… ეს ფოტოესესია მოხვდა წამყვანი მოდური ბეჭდური გამოცემების ყდებზე და ფურცლებზე, ყველა სოციალურ პლატფორმაზე, ყველა გაჯეტის ეკრანზე და, ბოლოს და ბოლოს, ყველას ჯიბეში თუ ხელში – მობილურ ტელეფონებსა და სმარფონებში.
და ეს არის კამპანია, რომელზეც კი არ უნდა იკითხო, რომელიც უბრალოდ უნდა ნახო… ხოლო სათვალეები მოირგო და შეიყვარო – რადგან ისინი ყვება ისტორიას, ქალის და მამაკაცის მარადიულ და, ამავდროულად, ყოველ ჯერზე, ახალ ისტორიას

 

ავტორი: ლედი ანთიძე