George Piralli 2021 კოლექცია – „მზერა წარსულიდან – მომავალში“

        George Piralli 2021
კოლექცია – „მზერა წარსულიდან – მომავალში“

 

ფოკა, სკრა, სალმე, თელა…
ვედი, რენე, ვაიო, ფანაგა…
ეკი, ბოკონი, ინო, დიზი…
ეს მუსიკასავით მჟღერი, კეთილხმოვანი სიტყვები ქართული ტოპონიმებია.
უფრო მეტიც და სრულიად წარმოუდგენელიც – ეს ქართული სათვალეების ბრენდის – George Piralli – 2021 წლის ზაფხულის კოლექციის მოდელების სახელებია!
ჩვენ, ბრენდ George Piralli 2021 წლის კოლექციის შემქმნელებმა, გავშალეთ საქართველოს რუკა, თვალი გადავავლეთ ჩვენი ქვეყნის ისტორიულ წარსულს, გავიაზრეთ აწმყო და გავიხედეთ მომავალში!
ჩვენი მზერით წარულიდან – მომავალში არც თუ მარტივი, მაგრამ ნამდვილი ჭეშმარიტება აღმოვაჩინეთ: საქართველოს ისტორია, ძირითადად, თავისუფლებისთვის ბრძოლის ისტორიაა და ეს ბრძოლა უწყვეტია. XXI საუკუნეში ვიბრძოლებთ არა ცხენებით, ხმლებით ან ტყვიამფრქვევებით, არამედ ჩვენი იდეებით, მიზნებით, პროფესიონალიზმით, ტექნოლოგიებით, საქმით და თავდაუზოგავი შრომით… და რა შორსაც არ უნდა წავიდეთ, რა სიმაღლეებიც არ უნდა დავიპყროთ, ყოველთვის გვემახსოვრება დასაწყისი, ჩვენი წარსული. რადგან ძალა ჩვენს ფესვებში და წარმომავლობაშია, ჩვენს უნიკალობასა და თვითმყოფადობაშია. თანამედროვე ცვალებად, არამდგრად და გლობალისტურ სამყაროში მხოლოდ განუმეორებლობით და უნიკალურ ეთნიკურ კულტურასთან სიახლოვით თუ დავიმკვიდრებთ თავს.

ამიტომაც, დიახ! სწორედ – ფოკა, სკრა, სალმე, თელა, ვედი, რენე, ვაიო, ფანაგა, ეკი, ბოკონი, ინო, დიზი…
ეკი – ამჟამინდელი სენაკის მუნიციპალიტეტის სოფელი – ძველი კოლხეთის დიდების მოწმეა. აქ აღმოაჩინეს რომის იმპერიის ზარაფხანებში მოჭრილი 907 ვერცხლის მონეტა, დასტური რომაულ ცივილიზაციასთან ჩვენი მჭიდრო კავშირისა.
თელა – სოფელი ლაგოდეხის მუნიციპალიტეტში – ინახავს ძველბერძნულ, I, II საუკუნებით დათარიღებულ ჭურჭელსა და მოოქროვილ სამკაულს.
ფოკა – სოფელი ფარავნის ტბის ნაპირას – IV საუკუნეში ვაზის ჯვრით ხელში, წმინდა ნინოს საქართველოში შემოსვლის თვითმხილველია.
სკრა – სოფელი გორის მუნიციპალიტეტში – ადგილია, სადაც XVIII საუკუნეში ერეკლე მეფემ ლეკთა ჯარი დაამარცხა.
სალმე კი, სოფელია აფხაზეთში, რომელიც ამჟამად რუსეთის ფედერაციის მიერ ოკუპირებულია.
და ჩვენი მზერით წარულიდან – მომავალში შევქმენით და ახლა წარმოგიდგენთ George Piralli-ს 2021 წლის ზაფხულის კოლექციას. საქართველოს სოფლებსავით ძვირფას, გასაფრთხილებელ და უნიკალურ მოდელებს. თითოეული ჩვენი ფესვების და თვითმყოფადობის გამოვლინებაა და სიამაყით ატარებს სახელს, ყუნწის შიდა მხარეს რომ აწერია!

მოდელები – ფოკა, სკრა, სალმე, თელა, ვედი, რენე, ვაიო, ფანაგა, ეკი, ბოკონი, ინო, დიზი – გამორჩეულად თამამი, გამბედავი და მოდერნისტულია. ისინი თავის თავში აერთიანებს ოპტიკის მსოფლიო ინდუსტრიის კლასიკად ქცეულ ფორმებს და უკანასკნელ მოდერნისტულ მიგნებებს.
ეს არის ნამდვილი მზერა წარსულიდან – მომავალში: წარსულის საუკეთესო ტრადიციების, ხარისხის სტანდარტის და მასალათა სიძვირფასის დაცვით და მომავლის თამამი და ექსპერიმენტალური დიზაინერული გადაწყვეტებით.
მხოლოდ უმაღლესი ხარისხის აცეტატი, მეტალი, ზამბარებიანი ყუნწები, ორიგინალური რივეტები, ფერთა დახვეწილი კომბინაცია, გამოკვეთილი და მოცულობითი ფორმები, მრავალწახნაგიანი ფრონტები და ყუნწები, მკაცრი გეომეტრიული ხაზები, პრიალა და გლუვი ზედაპირები, მოდერნისტული ფაქტურები, ლინზებზე ამოტვიფრული ბრენდის ინიციალები… ეს არის კოლექცია, რომელიც საკუთარი თვალით უნდა ნახოთ და რომელსაც საკუთარი ხელით უნდა შეეხოთ!
კოლექცია, სახელად „მზერა წარსულიდან – მომავალში“ – არის ნამდვილი გარღვევა და ახალი სიტყვა George Piralli-ს, როგორც ბრენდის არსებობის ისტორიაში. გვჯერა, ეს კოლექცია, კიდევ უფრო მაღალ საფეხურზე აიყვანს ჩვენი მომხმარებლის ინოვატორულ ბუნებას და სრულიად ახალ სტანდარტს შექმნის ოპტიკის მოდის ეროვნულ ინდუსტრიაში.
მანამდე კი იცნობდეთ და გიყვარდეთ:
ფოკა, სკრა, სალმე, თელა…
ვედი, რენე, ვაიო, ფანაგა…
ეკი, ბოკონი, ინო, დიზი…

ავტორი:
ლედი ანთიძე